ነቲ ቤት ትምህርቲ ብሓባር መሪቖም ዝኸፈትዎ ፈፃሚ ዳይሬክተር ማ.ል.ት ኣምባሳደር ተወልደ ገብሩ፣ ኣመሓዳሪ ዞባ ምብራቕ ኣይተ ነጋ በርሀን ኣይተ ኣረጋዊ ሃይሉን’ዮም፡፡
ኣብቲ ስነ ስርዓት ምረቓ ዝተረኸቡ ዋና ኣመሓዳሪ ወረዳ ሳዕስዕ ፃዕዳ እምባ ኣይተ ተወልደ “ ኩልሻዕ ኣብ ኣብያተ ትምህርትና ዝረኣዩ ፀገማት ኣብ ምቅላል ርኡይ ተራ ዝነበሮም ኣይተ ኣረጋዊ ሎምውን ካብ ጎንና ከይተፈለዩ ደረጅኡን ፅሬቱን ዝሓለወ ቤት ትምህርቲ ሰሪሖም ስለዝረከቡና ብስም ህዝብን ምምሕዳርን ነመስግን” ኢሎም፡፡
ፈፃሚ ዳይሬክተር ዓለምለኸ ቤት ፅሕፈት ማልት ኣምባሳደር ተወልደ ገብሩ’ውን “ንፃውዒት ቴሌቶን ማልት ህፁፅ ምላሽ ሂቦም ዓመት ኣብዘይመልእ ቤት ትምህርቲ ሃኒፆም የረክቡ ንዘለው ንኣይተ ኣረጋዊ ሃይሉ ብምንኣድ፣ ኣብ ቴሌቶን ማልት ኣብያተ ትምህርቲ ሃኒፆም ንምርካብ ካብዝተመፃብዑ ልዕሊ ሰብዓ ትካላትን ሰብ ሃፍትን ዛጊድ እቶም ዕስራን ሸሞንተን ሰሪሖም ከምዘረከቡን እቶም ኣርባዓን ሓሙሽተን ድማ ህንፀቶም ኣብምዝዛም ከምዝርከቡን ብምዝኽኻር፣ ብተሳትፎ መላእ ህዝቢ ትግራይ ኣርባዕተ ሚኢቲ ኣብያተ ትምህርቲ ካብ ዳስ ናብ ህንፃ ምቕያረን ብምሕባር ማልት ምስ ህዝባ ኮይና ምልማዕ ከምትቕፅለሉ ገሊፆም፡፡”
ነቲ ቤት ትምህርቲ ሰሪሖም ንህዝቢ ዘረከቡ ኣይተ ኣረጋዊ ሃይሉ ብወገኖም ኣብዘስምዑዎ ዘረባ “ማልት ኣብዘካየደቶ ቴሌቶን ተመፃቢዐ ቤት ትምህርቲ ንምህናፅ ምብቀዐይ ሓጎስይ ደረት የብሉን፣ ኩሉ፡፡ ዓደይን ህዝበይን ይፈቱ እየ ዝብል ወናኒ ሃፍቲ ድማ እጃሙ ከወፊ በዚ ኣጋጣሚ’ዚ እፅውዕ ድሕሪ ምባል፣ ንቐፃሊ ላይብረሪ፣ መንበሪ ገዛን መዘናግዒን መምህራን፣ ኮምፒተርን ዝኣመሳሉን ከምዘማልኡ ቃል ኣትዮም፡፡
መስከረም 2001 ዓ.ም ዝተኻየደ ሚሊኒየም ቴሌቶን ማልት ዕውት ምንባሩ ዝዝከር’ዩ፡፡