ኣብ ስነስርዓት ምረቓ ዝተረኸቡ ኢንጅነር ኣወጣሀኝ ኪሮስ “በቲ ስሪሓዬ ዘለኹ ቤት ት/ቲ ከየብቃዕኹ፣ ንቕድሚት ምምሕዳር ተወሳኺ መሬት እንተሂቡኒ ከስፋሕፍሖ እየ ጎደሎታት ድማ ከማልእ’የ” ኢሎም።

ከንቲባ ከተማ ዓድዋ ኣይተ ኣርኣያ መርእድ ብወገኖም ኣብ ዘስምዑዎ ዘረባ “ፅሬትን ሽፋንን ት/ቲ ንምርግጋፅ ህዝቢ፣ ፈተውቲ ልምዓትን መንግስትን ተዋዲዶም ይሰርሑ ብምህላዎም ዘይነዓቕ ለውጢታት ኣብ ምምዝጋብ ከምዝርከቡ ብምሕባር ብኢንጅነር ኣወጣሀኝ ኪሮስ ተሃኒፁ ንርከቦ ዘለና ልዑል ህያብ ኣብ ልምዓት ሓይሊ ሰብና ዘይነዓቕ ኣበርክቶ ዘለዎ ትካል ት/ቲ ብምዃኑ ንወናኒ ኣኪር ኮንስትራክሽን ንኢንጅነር ኣወጣሀኝ ኪሮስ እንተላይ ንናይ ቅድሚ ሀዚ ብኣማኢት ኣሽሓት ዝግመት ልምዓታዊ ኣበርክቶኦም ብስም ተረባሕቲ ህፃናትን ምምሕዳሮምን ድሕሪ ምምስጋን፣ ብመሰረት ሕቶ እቶም በዓል ሃፍቲ ቤት ት/ቲ ከስፋሕፍሕሉ ዝኽእሉ ናይ 58 ሽሕ ትርብዒት ሜትር ሳይት ፕላን ንኢንጅነር ኣወጣሀኝ ኪሮስ ኣረኪቦም።

ዋና ፈፃሚ ዳይሬክተር ማልት ኣምባሳደር ተወልደ ገብሩ ኣብዘስምዑዎ ዘረባ ድማ “ማልት ኣብ ዕስራ ዓመት ጉዕዞኣ ኣብ ቡዙሕ ዘፈር ልምዓት ተዋፊራ ልዑል ኣበርክቶ ምግባራን፣ ምልማዓ ንምሕያል ኣብ ዝሓለፈ ዓመት ብዝወለዓቶ ቴሌቶን ብዘተኣኻኸበቶ ልዕሊ 146 ሚልዬን ብር ኣብ ፅርየት ት/ቲ ኣድሂባ ትገብሮ ብዘላ ምንቅስቓስ ዛጊድ 3,500 መምሀሪ ክፍልታት ዘጠቓለሉ ከባቢ 400 ኣብያተ ት/ቲ ካብ ዳስ ናብ ህንፃ ምቕያራ ድሕሪ ምሕባር፣ ንገባሪ ሰናይ ኢንጅነር ኣወጣሀኝ ኪሮስ ርኡይ ምንቅስቓስ ልምዓት ብምንኣድ፣ ኩለን ኣብ ትግራይና ዝርከባ መምሀሪ ዳሳት ናብ ህንፃ ንምቕያር ምንቅስቓስ ይግበር ምህላው ብምግላፅ፣ ህዝቢ ኣብ ማልት ተወዲቡ እጃሙ ከወፊ ፀዊዖም።”