ኣብዚ በዓል ላዕለዎት ሰበ ስልጣናት ሃገርና ፣ ሰብ ሃብቲ ፣ ኣባላትን ደገፍትን ማልት ዝተረኸቡ እንትኾን ዝተፈላለዩ ዜማታት ብሄር ብሄረሰባት ሃገርና ዝደርፉ ደረፍቲ ከምኡ’ውን ሙዚቀኛታት ሰርከስ ትግራይ ካብ 7፡00 ሰዓት ድሕሪ ሰዓት ጀሚሩ ክሳብ ምሸት 4፡00 ሰዓት ኣብቲ ኣዳራሽ ንዝተረኸበ ህዝቢ እናዘናግዑ ኣምሽዮም እዮም።
ኣብቲ በዓል ኣብ መንጎ ህፃናት ፣ ደቂ ኣንስትዮን ደቂ ተባዕትዮን ውድድር ትልሂት ዝተኻየደ እንትኾን ነቲ በዓል ፍሉይ ድምቀት ሂቡዎ እዩ። ኣብቲ ውድድር ሳዕስዒት ንዝተዓወቱ ተወዳደርቲ ከካብ ምድቦም
1ይ ንዝወፁ ንሕድ ሕዶም 1,500.00 ብር
2ይ ንዝወፁ ንሕድ ሕዶም 1,000.00 ብር
3ይ ንዝወፁ ንሕድ ሕዶም 500.00 ብር ሽልማት ተበርኪቱሎም እዩ።
ካብ ጨናፍር ጀሚሩ ንዝተኻየዱ ውድድራት ስፖንሰር ዝገበሩ ኣባል ቦርድን ትካላዊ ኣባል ማልትን ኣይተ ገ/እግዚኣብሄር እምባየ ዝተብሃሉ ግዱስ ትግራዋይ እዮም።
ሓደ ሓደ ተሳተፍቲ እቲ በዓል ኣብ ዝሃቡዎ ሪኢቶ ከምዚ ዓይነት በዓል በቢዓመቱ ብምኽባር ኣባላትን ደገፍትን ነዚ እናዘከሩ ማልት ካብ ህሊንኦም ከይትፍለ ኣብ ዕብየት ባህሊ ትግራይ’ውን ኣስተዋፅኦ ስለዝገብርን ኣባላት እታ ማሕበር ንምትእኽኻብን ኣብ ልምዓት ዓዶም ንምዝታይ ይጠቅም እዩ ኢሎም።
ኣብዚ በዓል ናይ ክብሪ ጋሻ ኮይኖም መልእኽቲ ዘሕለፉ ኣባል ቦርድ ማልት ዶ/ር ሃይለ ሚካኤል ኣበራ እዮም ክብል ካብ ኮሚዩኒኬሽንን ርክብ ህዝብን ማልት ዝበፅሐና ዜና ይሕብር።