ትካል ገባሪ ሰናይ ሳንሻይን ኣብዛ ሃገር ንዝርከቡ 1000 ወለዶም ዝሰኣኑ ህፃናትን ካብ ፅጉማት ቤተሰብ ዝተረኸቡ ተምሃሮን ግልጋሎት ዝውዕሉ 3 ኣብያተ ት/ቲ ኣብ ዝተመረፁ ከተማታት ሰለስተ ክልል ንምስራሕ እናተንቀሳቀሰ ይርከብ።  ብመሰረት እዚ ክልል ትግራይ ካብተን በቲ ትካል ገባሪ ሰናይ ዝተሓረያ ክልላት ኦሮሚያን ደቡብን ሓንቲ ኮይና ሓደ 2^ይ ብርኪ  ቤት ትምህርቲ ኣብ ከተማ ኣኽሱም ንምህናፅ ዕለት 6 ጥሪ እምነሰረት ተነቢሩሎ።

ኣብቲ ስነስርዓት ዝተረኸቡ ርእሰ ምምሕዳር ክልልና ትግራይ ኣይተ ፀጋይ በርሀ ከምዝበልዎ “መሰረት ታሪክ ኢትዬጵያውያን ኣብ ዝኾነት ከተማ ኣኽሱም ዝተቐመጠ እምነሰረት እቶም በዓል ሃፍትን ትካሎምን ኢትዬጵያዊነቶም ዘመስከሩሉን ንኻልኦት ኢትዬጵያውያን ሰብ ሃፍቲ’ውን ዓብዩ ት/ቲ ዘሕልፍን’ዩ ኢሎም”።

ወናኒ ሳንሻይን ኮንስትራክሽን ሓ.ዝተ.ው.ማሕበርን መስራቲ ትካል ገባሪ ሰናይ ሳንሻይን ኮንስትራክሽን ኣይተ ሳሙኤል ታፈሰ ብወገኖም መንግስቲ ህዝብን ውልቀ ትካላትን ተሓባቢርና ዝተዋደደ ምንቅስቓስ እንተደኣጌርና ኣብ ዝቕፅልሉ 5 ዓመታት ድኽነት ብምቕናስ ልመና ሙሉእ ብሙሉእ ምጥፋእ ከምንኽእል እምነተይ ፅኑዕ’ዩ ኢሎም። ትካሎም ድኽነት ንምጥፋእ ንዝግበሩ ፃውዒታት ተግባራዊ ምላሽ እናሃበ ህዝባዊ ወገናውነት ብቐፃልነት ከምዘረጋግፅ ቃል ኣትዬም ‘ዮም ኣይተ ሳሙኤል።

ኣምባሳደር ተወልደ “ካብ ዳስ ናብ ክላስ ዝብል ፃውዒት ሰብሃፍቲ’ዛ ሃገርን ክልል ትግራይን ፈተውቲ ልምዓትናን ብዝገበሩዎ ዝተዋደደ ምንቕስቓስ ኣብ ክልል ትግራይ ካብ ዝነበሩ ልዕሊ 800 መምሃሪ ክፍልታት ዳስ እቶም ከባቢ 400 ናብ ህንፃ ምስግጋሮም ናይዚ ዕውት ምንቅስቓስ መርኣያ ምዃኑ ኣረዲኦም።